អង្គការអន្តរជាតិហ្វ្រង់កូហ្វូនី (OIF)

ព័ត៌មានទូទៅ

១. ព័ត៌មានជាមូលដ្ឋានអំពីអង្គការ OIF

កាលបរិច្ឆេទបង្កើត ៖ ២០ ខែមីនា ឆ្នាំ១៩៧០ ។
បិតាស្ថាបនិក ៖ Léopold Sédar Senghor (អតីតប្រធានាធិបតីសេនេហ្កាល) Habib Bourguiba (អតីតប្រធានាធិបតីទុយនីស៊ី) Hamani Diori (អតីតប្រធានាធិបតីនីហ្សេ) និងព្រះបរមរតនកោដ្ឋ នរោត្តម សីហនុ ព្រះមហាវីរក្សត្រនៃព្រះរាជាណាចក្រកម្ពុជា។
ទីស្នាក់ការ ៖ ទីក្រុងប៉ារីស ប្រទេសបារាំង ។
សមាជិក ៖ មាន ៩៣រដ្ឋ និងរដ្ឋាភិបាល (៥៦ពេញសិទ្ធិ ៥សមាជិកមិនពេញសិទ្ធិ និង ៣២សង្កេតការណ៍) ។
គោលដៅ ៖ អង្គការអន្តរជាតិហ្វ្រង់កូហ្វូនីមានបេសកកម្មធ្វើឱ្យសម្រេចនូវសាមគ្គីភាពរវាងរដ្ឋ និងរដ្ឋាភិបាលជាសមាជិក ព្រមទាំងចូលរួមចំណែកធ្វើឱ្យប្រសើរឡើងនូវកំរិតជីវភាពរបស់ប្រជាពលរដ្ឋនៃប្រទេសជាសមាជិក។ អង្គការ OIF គាំទ្រដល់រដ្ឋជាសមាជិកក្នុងការបង្កើត ឬពង្រឹងគោលនយោបាយរបស់រដ្ឋសមាជិក ដឹកនាំសកម្មភាពនយោបាយអន្តរជាតិ និងកិច្ចសហប្រតិបត្តិការពហុភាគី លើបេសកកម្មចំបងចំនួនបួន តាមការកំណត់របស់កិច្ចប្រជុំកំពូលហ្វ្រង់កូហ្វូនី ៖
- លើកកម្ពស់ភាសាបារាំង វប្បធ៌ម និងភាសាផ្សេងៗ
- លើកកម្ពស់សន្តិភាព លទ្ធិប្រជាធិបតេយ្យ និងសិទ្ធិមនុស្ស
- គាំទ្រការអប់រំ ការបណ្តុះបណ្តាល ឧត្តមសិក្សា និងការស្រាវជ្រាវ
- អភិវឌ្ឍកិច្ចសហប្រតិបត្តិការ ដោយបំរើឱ្យការអភិវឌ្ឍប្រកបដោយចីរភាព
អ្នកប្រើប្រាស់ភាសាបារាំង (២០២២) ៖ មានចំនួនប្រមាណ ៣២១ លាននាក់ អាចត្រូវគេកំណត់ថាជាអ្នកចេះនិយាយភាសាបារាំងពិតប្រាកដ។ អ្នកប្រើប្រាស់ភាសាបារាំងនៅអាស៊ីអាគ្នេយ៍ ៖ នៅកម្ពុជាមានចំនួន ៤៦៣ ០០០នាក់ គឺស្មើនឹង ៣% នៃប្រជាជនរបស់ខ្លួន, ឡាវមានចំនួន ២០៤ ០០០នាក់ គឺស្មើនឹង ៣% នៃប្រជាជនរបស់ខ្លួន, វៀតណាមមានចំនួន ៦៩៣ ០០០នាក់ គឺស្មើនឹង ១% ។

២. នៅក្នុងអង្គការអន្តរជាតិហ្វ្រង់កូហ្វូនី

អគ្គលេខាធិការនៃអង្គការអន្តរជាតិហ្វ្រង់កូហ្វូនី គឺជាអ្នកទទួលខុសត្រូវដ៏ខ្ពស់បំផុតរបស់អង្គការនេះ។ លោកជំទាវ Louise MUSHIKIWABO ត្រូវបានចាត់តាំងឱ្យបំពេញមុខដំណែងនេះ ដោយកិច្ចប្រជុំកំពូលហ្វ្រង់កូហ្វូនី នៅឆ្នាំ ២០១៨ នាទីក្រុងយ៉េរ៉េវ៉ាន់ ប្រទេសអាមេនី និងបានបំពេញមុខដំណែងនេះ ចាប់តាំងពីខែ មករា ឆ្នាំ២០១៩។
អភិបាលនៃអង្គការ OIF ត្រូវបានតែងតាំងដោយអគ្គលេខាធិការ។ អភិបាលទទួលបន្ទុកអនុវត្ត និងគ្រប់គ្រងកិច្ចសហប្រតិបត្តិការរបស់អង្គការ OIF ។ លោកស្រី Caroline St-Hilaire បំពេញមុខដំណែងនេះ ចាប់តាំងពីខែមីនា ឆ្នាំ២០២៣។
អង្គការអន្តរជាតិហ្វ្រង់កូហ្វូនីត្រូវដាក់ឱ្យស្ថិតនៅក្រោមការដឹកនាំរបស់ស្ថាប័ននយោបាយចំនួន ៣ គឺៈ កិច្ចប្រជុំកំពូល (Sommet), សន្និសីទថ្នាក់រដ្ឋមន្ត្រីហ្វ្រង់កូហ្វូនី (CMF) និងកិច្ចប្រជុំក្រុមប្រឹក្សាអចិន្ត្រៃយ៍ហ្វ្រង់កូហ្វូនី (CPF) ។
អង្គការអន្តរជាតិហ្វ្រង់កូហ្វូនី មាន៖
- តំណាងអចិន្ត្រៃយ៍ចំនួន ៤ គឺ
  - នៅអាប់ឌីអាបេបា (Addis-Abeba) ប្រចាំសហភាពអាហ្វ្រិក និងប្រចាំគណៈកម្មការសេដ្ឋកិច្ចអាហ្រ្វិកនៃអង្គការសហប្រជាជាតិ
  - នៅទីក្រុងប្រ៊ុចសែល (Bruxelles) ប្រចាំសហភាពអឺរ៉ុប
  - នៅទីក្រុងញូវយ៉ក (New York) និង នៅទីក្រុងហ្សឺណែវ (Genève) ប្រចាំអង្គការសហប្រជាជាតិ
- ការិយាល័យតំបន់ចំនួន ៨ គឺ
  - នៅទីក្រុងឡូមេ (ប្រទេសតូហ្គោ) សំរាប់អាហ្វ្រិកខាងលិច
  - នៅទីក្រុងលីប្រឺវីល (ប្រទេសហ្កាបុង) សំរាប់អាហ្វ្រិកកណ្តាល
  - នៅទីក្រុងហាណូយ (ប្រទេសវៀតណាម) សំរាប់តំបន់អាស៊ី-ប៉ាស៊ីហ្វិក
  - នៅទីក្រុងព័រអូប្រាំងស៍ (ប្រទេសហៃទី) សំរាប់តំបន់ការារិប និងអាមេរិកឡាទីន
  - នៅទីក្រុងប៊ុយការេស្ត (ប្រទេសរ៉ូមានី) សំរាប់អឺរ៉ុបកណ្តាល និងអឺរ៉ុបខាងកើត
  - នៅទីក្រុងអង់តាណាណារីវ៉ូ (ប្រទេសម៉ាដាហ្កាស្កា) សំរាប់មហាសមុទ្រឥណ្ឌា
  - នៅទីក្រុងទុយនីស (ប្រទេសទុយនីស៊ី) សំរាប់អាហ្វ្រិកខាងជើង
  - នៅទីក្រុងបេរូត (ប្រទេសលីបង់) សំរាប់មហាមជ្ឈិមបូព៌ា

៣. ស្ថាប័នអមអង្គការអន្តរជាតិហ្វ្រង់កូហ្វូនី

អង្គការអន្តរជាតិហ្វ្រង់កូហ្វូនីធ្វើសកម្មភាពដោយពួតដៃគ្នាជាមួយសភានិយាយភាសាបារាំង (APF) ជាមួយប្រតិបត្តិករឯកទេសចំនួន ៤ នៃកិច្ចប្រជុំកំពូល ដូចជា ទីភ្នាក់ងារឧត្តមសិក្សាប្រើប្រាស់ភាសាបារាំង(AUF) ទូរទស្សន៍ TV5 Monde សមាគមអន្តរជាតិនៃបណ្តាអភិបាលក្រុងនិយាយភាសាបារាំង (AIMF) និងសាកលវិទ្យាល័យសង់ហ្គ័រដាឡិចហ្សង់ឌ្រី (Université Senghor d’Alexandrie)។ អង្គការ OIF ធ្វើសកម្មភាពដោយពួតដៃគ្នាផងដែរជាមួយសន្និសីទថ្នាក់រដ្ឋមន្ត្រីជាអចិន្ត្រៃយ៍ពីរ គឺ សន្និសីទរដ្ឋមន្ត្រីអប់រំជាតិ (Confémen) និងសន្និសីទរដ្ឋមន្ត្រីយុវជន និងកីឡា (Conféjes) ។

៤. ព្រះរាជាណាចក្រកម្ពុជា និងអង្គការអន្តរជាតិហ្វ្រង់កូហ្វូនី

នៅខែវិច្ឆិកា ឆ្នាំ១៩៩១ ៖ ក្លាយជាសមាជិកសង្កេតការណ៍ នាកិច្ចប្រជុំកំពូលហ្វ្រង់កូហ្វូនីលើកទី៤ នៅឆាយយូ (ទីក្រុងប៉ារីស) ប្រទេសបារាំង
នៅខែតុលា ឆ្នាំ១៩៩៣ ៖ ក្លាយជាសមាជិកពេញសិទ្ធិ នាកិច្ចប្រជុំកំពូលហ្វ្រង់កូហ្វូនីលើកទី៥ នៅទីក្រុងក្រង់បេ ប្រទេសម៉ូរីស

៥. កិច្ចប្រជុំហ្វ្រង់កូហ្វូនីនាពេលខាងមុខ

សន្និសីទថ្នាក់រដ្ឋមន្ត្រីហ្វ្រង់កូហ្វូនីលើកទី ៤៦ (CMF) នឹងប្រព្រឹត្តទៅនៅ ឆ្នាំ ២០២៥ នៅទីក្រុងគីហ្គាលី (Kigali) ប្រទេសរវ៉ាន់ដា
កិច្ចប្រជុំកំពូលហ្វ្រង់កូហ្វូនីលើកទី ២០ នឹងប្រព្រឹត្តទៅនៅឆ្នាំ២០២៦ នៅប្រទេសកម្ពុជា
សំរាប់ព័ត៌មានបនែ្ថម សូមមើលគេហទំព័រៈ francophonie.org

១. ព័ត៌មានជាមូលដ្ឋានអំពីអង្គការ OIF

២. នៅក្នុងអង្គការអន្តរជាតិហ្វ្រង់កូហ្វូនី

៣. ស្ថាប័នអមអង្គការអន្តរជាតិហ្វ្រង់កូហ្វូនី

៤. ព្រះរាជាណាចក្រកម្ពុជា និងអង្គការអន្តរជាតិហ្វ្រង់កូហ្វូនី

៥. កិច្ចប្រជុំហ្វ្រង់កូហ្វូនីនាពេលខាងមុខ

តាមដានពួកយើងនៅលើបណ្តាញសង្គម